Talentuaren Guneak 14 proiektu hautatu ditu

«Balorazio prozesu sakon baten ostean» Talentuaren Guneak hautatutako 14 proiektuak jakinarazi dituzte. 'Una Thermomix en el desierto' proiektua izan zen eguneko nabarmenetako bat. Marta Guillének eta Inés Calerok zuzenduta, FIPADOC Saria jaso zuen, izen bereko jaialdirako sarbidea eskaintzen duena, eta baita Lau Haizetara Saria ere, Donostia Zinemaldiaren esparruan Dokumentalen Koprodukzio Foroan parte hartzeko sarbide zuzena ematen duena.

Gainera, oraingoan D'A Film Lab Barcelonak bi sari ematea erabaki du: Iker González Urrestiren 'Mendi' lanari, eta Saioa Miguel eta Alazne Astorga zuzendarien 'La batida' proiektuari. Saria Producció Emergente sailean parte hartzeko zuzeneko hautaketa da.

Abycine Lanza jaialdiak Abycine Lanza Conexiones saria eman dio Begoña Aranaren 'Itzuli' filmari. Proiektuaren taldeko bi ordezkari azokara joan ahal izango dira akreditazio profesionalarekin. Bestalde, Euskal Herriko Zinema Eskolak Daniel González Alegrete eta Santiago Skiappa zuzendarien 'High' proiektua saritu du gidoi-aholkularitza eskaintzen duen ECPV sariarekin.

Era berean, Itxaso Jurado eta Ainara Martínez de Albéniz zuzendariek Iberseries saria jaso dute 'Laboa' lanagatik. Sariak Iberseries eta Platino Industrian parte hartzeko kortesiazko bi akreditazio biltzen ditu. Azkenik, Weird Market-ek Lau Maquedanoren 'Bitxos' proiektuari bere merkaturako sarbide zuzena ematea erabaki du.

2025ekoa Zineuskadik ikus-entzunezkoen ekoizpen eta errealizazioko profesionalen belaunaldi berriei laguntzeko bultzatutako Talentuaren Guneak ekimenaren hirugarren edizioa izan da. Horretaz gain, industrian lehen urratsak ematen ari diren ekoizle eta errealizadoreentzako topagune izan nahi du.

Gasteizko Parke Teknologikoan egindako topaketan sektoreko profesional ugari izan ziren, 20 euskal ekoiztetxe baino gehiagoren ordezkariak, baita aurtengo epaimahaia osatzen duten profesionalak ere: Nerea García Guillén (Lau Haizetara), Bastien Gauclere (Fipadoc), Pedro Andrade (Bartzelonako D 'A Festival de Cinema), Manuel J. Lacasa (Abycine Lanza), José Luis Farias (Weird Market), Elodie Mellado (Filmin) eta Samuel Castro (Iberseries).