UEUren 53. Udako Ikastaroak asteazkenean hasiko dira

UEU Udako Euskal Unibertsitatearen 53. uda ikastaroak hasiko dira asteazkenean, Euskaltzaindiaren Bilboko egoitzan. Lehenengo jardunaldi honetan Inguma datu basearen 25. urteurrena izango da aztergai. Euskal komunitate zientifikoarekin batera, Ingumak egin duen ekarpena aztertuko da bertan, beste hizkuntza gutxitu batzuek egindako lana ezagutu eta aurrera begira jarri.

Orain dela 25 urte, UEUk Bizkaiko Foru Aldundiaren laguntzaz, Inguma datu-basea abiatu zuen. Urte hauetan, unibertsitate-mailako zientzia- eta jakintza-alor bakoitzean euskaraz ahoz eta idatziz ekoitzi denari buruzko oinarrizko informazioa dokumentatu du, hau da, euskaraz zer egin den eta nork egin duen jaso du

UEUk jakinarazi duenez, ongietorria eta jardunaldiaren aurkezpena 10:15ean izango da, eta Andres Urrutiak (Euskaltzaindia), Aitor Bengoetxeak (UEU), Josune Irabienek (Eusko Jaurlaritza), Isaac Amezagak (Bizkaiko Foru Aldundia) eta Oskia Agirre eta Koldo Garcia (jardunaldiko batzorde akademikoko kideak) parte hartuko dute.

Jarraian, Marije Bidaguren eta Koldo Garcia UEUkideek 'Inguma, 25 urteko bilduma' hitzaldi solastatua eskainiko dute 10:30ean, eta Llorenç Arguimbau informazio zientifikoko aholkularia 'Katalana hizkuntza akademiko eta zientifiko gisa: egungo egoera eta etorkizunerako proposamenak' gaiaz ariko da 11:00etan.

Cafe Bilbao-n kafetxoa hartzeko tarte baten ondoren, 'Inguma, beste 25 urtez lanabes eraginkorra izaten' mahai ingurua egingo da 12:30ean, Amaia Torrealday Gallareta eta Aitor Zuberogoitia Espillaren (Mondragon Unibertsitateko HUHEZI), Jon Zarateren (EHUko Farmazia Fakultateko irakasle-ikertzailea eta UEUko bazkidea) eta Patricia Barronen (EHU) parte hartzearekin.

Topaketa bukatzeko, Goiaz Elgezabal Inguma proiektuko arduradunak jardunaldia ondorioak laburbilduko ditu 13:45etik 14:00etara.

Aurtengo Uda Ikastaroetan 20 jardunaldi eta topaketa antolatu ditu UEU-k hainbat eragilerekin elkarlanean, euskal gizartearentzat garrantzitsuak diren gaien inguruan hausnartzeko helburuarekin.

• Temas
• Udako Euskal Unibertsitatea (UEU)